मुलांच्या जडणघडणीतील एक अत्यंत महत्त्वाचा टप्पा म्हणजे प्राथमिक शिक्षण. एखादी इमारत उभारत असताना जसे तिचा पाया भक्कम करण्याकडे आपला अधिक कल असतो, अगदी त्याचप्रमाणे प्राथमिक शिक्षण हा जीवनाच्या इमारतीचा पायाच. तो भक्कम करण्यासाठी इथे अत्यंत हुशार आणि कष्टाळू असे शिक्षकवृंद आहेत. पहिली ते चौथी या वर्गांमध्ये मराठी आणि सेमी तुकड्यांमधून एकूण 780 विद्यार्थिनी शिक्षण घेत आहेत. प्राथमिक शाळेच्या मुख्याध्यापिका सौ. संजीवनी नगरकर यांनी लोकसहभागातून मुलींसाठी पाणी पिण्याचा फिल्टर, तसेच फरशा आणि खेळण्यासाठी बाग विकसित केलेली आहे. मुलींच्या सर्वांगीण विकासासाठी विविध उपक्रम इथे राबवले जातात. आधुनिक काळाची गरज ओळखून अगदी पहिलीपासूनच मुलींना संगणकाचे शिक्षण तसेच इंग्लिश व कन्नड भाषेचे प्रशिक्षण दिले जाते. आणि त्याचबरोबर विविध खेळांचेही प्रशिक्षण मुलींना दिले जाते.